Matt 28 i NLT startar slik: “as the new day was dawning” før vi får forteljinga om oppstoda. Det slo meg at ved oppstoda har ein heilt ny dag i menneskesoga brote fram. Oppstoda er starten på ein ny dag, ein heilt ny start for eit nytt liv, ja for eit heilt nytt tilvære.

Jesus døydde og vart gravlagd. Han stod oppatt tredje dag, slik Skrifta hadde sagt. Synd, skam, død og grav er overvunne. Jesus har brote dødens makt. Han har stått opp frå dei døde. Han har difor fått all makt i himmel og på jord.

No skal denne store sigeren, denne fantastiske triumfen over dei nedbrytande kreftene i verda kungjerast for heile verda, for heile skapningen. Vårt oppdrag er heilt enkelt å forkynna evangeliet om Jesus Kristus som har stått opp frå dei døde og ført liv og udødeleg liv fram i lyset. 

Målet med å forkynna evangeliet om Guds rike er å gjera alle folkeslag til læresveinar. Når dei har teke imot evangeliet må dei døypast, dukkast under i vatn og gravleggja det gamle livet. Så blir dei reist opp til eit liv i lydnad. Oppdraget er ikkje over ved at folk kjem til tru, dei må lærast opp til å lyda eller halda alt det Jesus har bode oss. Vi skal med andre ord ikkje berre få folk til å tru evangeliet, oppdraget er å læra dei å leva evangeliet.

Så lenge vi gjer dette, er Jesus med oss. Alle dagar. Dagar med motgang og dagar med med medgang. Mørke og tunge dagar. Lyse og lett dagar. Alle dagar! Heilt til oppdraget er fullført og han kjem tilbake!